IS-SEBA' EDIZZJONI TAL-WIRJA GĦASAFAR TAL-GĦANA - RIZULTATI

Reġgħet magħna l-Wirja Għasafar tal-Għana, li din is-sena se ssir bejn it-21 u l-24 ta’ Novembru, 2013. Rigward il-wirja nista’ ngħidilkom mill-ewwel li għandna kukkardi totalment ġodda li huma sbieħ ħafna kif ukoll il-premijiet li se jingħataw fil-presentation dinner li se jsir f’Diċembru li wkoll huma differenti mis-snin ta’ qabel. Bħala judges se jerġa’ ikollna tlieta bħas-sena l-oħra; żewġ Ingliżi li se jiġġaġġjaw is-sezzjonijiet tal-vrieden il-ħodor u Belġjan li se jiġġaġġja l-kumplament tas-sezzjonijiet l-oħra. Għal din is-sena ħsibna li nintroduċu wkoll is-sezzjoni tat-timijiet bħalma jkun hemm fil-wirjiet internazzjonali. Din is-sezzjoni tikkonsisti fil-membru li jdaħħal erba’ suġġetti li jkunu jixxiebħu ħafna bħala tim wieħed u r-rebbieħ għandu ċ-ċans li jirbaħ mill-ewwel sat-tielet post u ċ-ċans li jirbaħ ukoll il-Best Team.

Ma’ din l-ittra għandkom issibu wkoll il-formola biex timlewha u ġġibuha magħkom mimlija dakinhar li jiddaħħlu l-għasafar li se jaħbat il-Ħamis 21 ta' Novembru bejn it-3.00 u s-7.00 ta' filgħaxiija. M’għandkomx diffikultajiet biex timlewha u importanti li tagħmlu hekk ħalli tinqdew mill-ewwel x’ħin tiġu bl-għasafar. Nixtieq infakkarkom li min m'hux membru mħallas fil-klabb ikun jista' jipparteċipa biss fis-sezzjonijiet “Open”. Għalhekk min ikun jixtieq li jieħu sehem fil kategoriji kollha, b’ċans ta’ rebħ akbar u ta’ premijiet aktar prestiġjuzi nħeġġuh li jġedded is-sħubija għas-sena 2013 dak in-nhar tad-dħul tal-għasafar.

Il-wirja tagħlaq il-bibien għal pubbliku il-Ħadd 24 ta' Novembru fil-5.00pm. Nixtiequ nitolbu il-koperazzjoni ta’ kullħadd sabiex l-għasafar jinġabru bil kwiet wara l-ħin tal-għeluq u li ħadd ma jitlaq mis-sala qabel ma’ jkun żgurat li kullħadd ikun ġabar l-għasafar tiegħu. Fl-aħħar napprezzaw kull għajnuna biex inzarmaw.

Issa ħa ngħaddilkom xi ftit informazzjoni inġenerali fuq il-ħidma tal-kumitat. Għalina din is-sena kienet mimlija daqs bajda u komplejna naħdmu fuq diversi affarijiet li għandhom x’jaqsmu mad-delizzju tagħna. Din is-sena ffokkajna ħafna mill-enerġija tagħna fuq l-istandard tal-verdun tax-show, bil-għan li dan jiġi rikonoxxut internazzjonalment u għalhekk jibda jkun hemm il-kategoriji tiegħu fil-wirjiet internazzjonali, fosthom fil-Mondjal. Saru wkoll tpinġijiet professjonali minn artist lokali dwar il-kulur, forma u l-profil eżatt tal-verdun tax-show. Issa l-pass li jmiss hu li nibagħtu l-materjal kollu lill-entitajiet konċernati biex naraw x’hemm bżonn li jsir aktar.

Flimkien mal-għaqdiet tal-għasafar l-oħra bdejna naħdmu fuq il-formazzjoni tal-Federazzjoni Maltija dwar it-trobbija tal-għasafar. Saru diġa’ diversi laqgħat dwar dan u t-taħdidiet għadhom għaddejjin. Li jkollna federazzjoni tkun ta’ għajnuna għall-klabbs kollha għax jekk inkunu magħqudin ikollna aktar saħħa meta niġu biex inġibu xi affarijiet favur il-wirjiet lokali u internazzjonali. Qegħdin naħdmu wkoll fuq it-twaqqif tal-websajt tagħna; http://www.songbirdassociationmalta.com. Din ġiet mibnija minn professjonist f’dan ix-xogħol u sa żmien il-wirja għandha tiġi llonċjata wkoll. Minn din is-sena se jkollna l-istaging tagħna u dan ġie mogħti lilna mill-MCBA.

Fl-aħħarnett nixtieq nirringrazzja lill-isponsors tagħna għax kif inħobb ngħid, mingħajr l-għajnuna tagħhom ikun impossibbli għalina li ntellgħu din il-wirja. Nirringrazzja wkoll lilkom il-membri għax bil-parteċipazzjoni u bl-għajnuna tagħkom ikollna dak l-ammont sabiħ ta’ għasafar ta’ kwalità li dejjem kellna s’issa. Għaldaqstant nisperaw li din is-sena nerġgħu narawkom tipparteċipaw bi ħġarkom bħalma għamiltu fis-snin l-imgħoddija u min jaf, forsi narawkom ukoll b’razez ġodda li rnexxilkom trabbu matul dan l-istaġun. Mela narawkom dakinhar tad-dħul tal-għasafar u f’isem sħabi tal-kumitat nirringrazzjakom.

Dejjem Tagħkom

Stephen Grech

Segretarju SBAM

Results 2013 - annual show 2013 results

Greenfinch placings 2013 - placings results